Hasiera orrialdea

 

Agerraldia eta sinaduren aurkezpena erregistroan

UPV/EHUk langileen eta ikasleen posta elektronikoaren zerbitzua Microsoft Office 365 delakoaren eskuetan utzi nahi izateak ireki ahal duen oinarriko zerbitzuen pribatizazioaren aurkako plataformak jasotako 700 sinadura baino gehiago erregistrotik sartu ditugu gaur Donostian.

Euskal Herriko Unibertsitateko gerentzia aspaldidanik unibertsitateko hainbat oinarrizko zerbitzu pribatizatzen ari da. Horien artean, Informazio eta Komunikazio Teknologien zerbitzua, korreo elektronikoa kudeatzeaz arduratzen dena. UPV/EHUko zuzendaritzak irakasle-ikertzaile, administrazio eta zerbitzuetako pertsonala eta ikasleen posta elektronikoak Microsoft Office 365era migratu nahi ditu erabiltzaileei beste aukerarik eman gabe.

Komunitate horren parte diren hainbat pertsonak Pribatizazioari Stop Plataforma sortzea erabaki genuen proiektu horren ondorioez kezkatuta: datu pertsonalak, proiektu eta ikerketen emaitzak enpresa pribatuen esku uztea; multinazional baten produktuekiko menpekotasuna; UPV/EHUren izaera publikoaren galera,eta UPV/EHUren dirua azpikontratazioetan xahutzea.

Aurtengo ekainean sinadura bilketa martxan jarri genuen eta dagoeneko plataformaren adierazpenak 700 atxikimendu baino gehiago jaso ditu. Unibertsitateko langile, ikasle eta sindikatu, eta norbanako zein elkarteen atxikimenduak.

Gaurko agerraldi honekin, UPV/EHUko errektoreari gure eskaerak helarazi nahi dizkiegu, hala nola: gure datu pertsonalak enpresa pribatu baten esku ez uztea, IKTen kudeaketan pribatizazioa baztertzea eta sofware librearen alde benetako konpromisoa hartzea.

UPV/EHUko zuzendaritzak gure eskakizunei emango dien erantzunen zain geratzen gara. Erantzun horiek ez genituzke hitzez jaso nahi baizik eta gure eskaeren alde egiten duten ekintzez.

Donostian, 2020ko uztailaren 15ean

Create your website at WordPress.com
Hasi zaitez